تقعد مرة في المترو فتلاقي اللي جنبك مش طايق نفسه ومجرد ما تبص عليه تلاقيه أتفتح في الكلام معاك ويفضل يشكيلك حاله أزاي مربوط في ساقية يطلع من البيت الصبح يرجع آخر الليل من الشغل وبعد ده كله الفلوس مش بتكفي،ما هو غلو الأسعار بيشطب علي المرتب.
شويه يهدأ ويقول الحمد لله البلد كلها ظروفها كده ،وطالما إحنا ساكتين وسيبين الحكومة تعمل فينا كدة يبقي إحنا نستاهل.
ومره تانية تلاقي ناس قاعدين علي القهوة بيشتكوا من ظروف البلد وأنهم قاعدين علي القهوة علشان مش لاقين شغل وبرضه بيقولوا إحنا نستاهل.
ويا سلام لما تقابل واحد من الناس اللي بتحب تقرأ الجرايد وبالذات صفحه الحوادث ويقعد يحكيلك أنه الأسبوع اللي فات قرأ في الجورنال عن يمكن تسع قضايا فساد، وكام عماره وقعت علي رأس سكانها، وكام واحد مات في حوادث سيارات،وأزاي أن الحكومة زورت الانتخابات وبعد ما يحكيلك ده كله يقولك إحنا نستاهل.
كل ما تروح مكان تلاقي الناس بتشتكي السكر وصل 7.5 ج للكيلو والطماطم قبله كانت بــ10ج للكيلو وايجار الشقة وصل 450ج شهريا يعني مفيش جواز وزياده نسبه العنوسه في البلد ومحدش لاقي شغل والحكومة محلتش ولا مشكلة من دول والناس تقلك إحنا نستاهل.
تنزل تتمشي شوية تلاقي الشوارع زحمة ومليانه زبالة ، والسحابه السودا هتخنقك ومش عارف تأخد نفسك،تنزل تجيب عيش تقف طابور والعيش ميتكلش ، تحب تروح شغلك تقف طابور ويا سلام لو عاوز تغير أنبوبه البوتاجاز برضة تقف طابور ومن الزهق تقول لنفسك إحنا نستاهل.
معرفش ليه مبقاش عندنا غير الكلام والشكوي بس ليه مبقناش نعترض علي اللي بيحصل لينا، ليه نثور ونخرب الدنيا لو واحد مسيحي قال كلمه حلوة لبنت مسلمه أو مسك أيدها أو العكس ، ليه نثور لو واحد في التلفزيون قال المسحيين وحشين أو العكس.
نفسي حتي لما نعترض علي حاجة يا ريت بلاش نكسر ونحرق بيوت وعربيات.
ما تيجي نعترض نحسس الحكومة أن الوضع مش عاجبنا وأننا تخنقنا بس من غير ما نحرق ونكسر ومنقعدش طول عمرنا نقول إحنا نستاهل.
